ООУ Гоце Делчев – Кавадарци

Историјата патува низ училниците во Македонија! Проектот „Промотивна турнеја – Тумба Маџари во основните училишта во Македонија“, денес беше промовиран во нашето училиште и учениците имаа можност подетално да се запознаат со нашето богато културно наследство. Овој проект беше реализиран во соработка со Министерството за култура и туризам и Националниот археолошки музеј на Македонија. Учениците денес имаа можност подетално да се запознаат со археолошкиот локалитет Тумба Маџари кој потекнува од неолитскиот период поточно од 5900 до 5300 години пред нашата ера. На учениците исто така им беше доделен и промотивен материјал (флаери и стикери) со кои дополнително се збогатија нивните знаења за праисторијата во Македонија.

Денес претставници од Одделот за превенција на малолетничка деликвенција при МВР ПСОН – Велес одржаа едукативна обука со учениците од VI и VII одделение на тема „Безбедност на интернет и сајбер насилство“. – Целта на обуката беше учениците да се информираат за безбедно користење на интернет, да научат како да го препознаат и спречат сајбер насилството, како и да не бидат жртви, но и да не вршат ваков вид насилство.

Мирот започнува во училиштето Нашето училиште, ООУ „Гоце Делчев“ – Кавадарци, се вклучува во процесот на градење мир и развој на мировно образование. Како прв чекор во насока на вклучување во мировното образование, нашето училиште имаше чест да биде дел од Базичната обука за Мировно образование, организирана од Првата детска амбасада во светот – МЕЃАШИ, во соработка со Министерството за образование и наука и Бирото за развој на образованието. Во рамки на обуката, училишниот психолог, Рената Анѓелкова, учествуваше во активности насочени кон развивање на вештини за ненасилна комуникација, препознавање и превенција на насилство, како и конструктивно и мирно справување со конфликти, особено во училишен контекст. Оваа обука претставува почеток на еден поширок и континуиран процес, преку кој нашето училиште ќе продолжи да развива активности насочени кон создавање безбедна, инклузивна и поддржувачка училишна средина за сите ученици.